Archive for the 'હાઈકુ' Category

“અત્તર અક્ષર”માંથી થોડાં હાઈકુ

March 7th, 2011

૧.

ઊડયું એક જ
પંખી ને કંપી ઊઠયું
આખુંય વૃક્ષ

૨.

ઊપડે ટ્રેન-
ફરફરી ના શકે
ભીનો રૂમાલ

૩.
કરચલીઓ
ચ્હેરે ને સ્નેહ પર
પડી તે પડી

૪.
કલરવતું
ઝરણું, ગીચ વૃક્ષો,
ખાલી બાંકડો.

૫.
કાળા ઝભ્ભામાં
રાત, જ્યુરી તારલા,
દિન આરોપી.

૬.

કૂંડે સુકાતી
તુલસી, શોધ્યા કરે
બાનાં પગલાં

૭.

ગમે તેટલી
ઊડતી ધૂળ, કદી
ન મેલાં ફૂલ

૮.

ચૂમી દીધી છે
એવી કે આગ આગ
ભભૂકી ગાલે

૯.

સૂરજ ફરે –
મનસૂબા ફરતા
સૂર્યમુખીના

૧૦.

સંધ્યાકાળના
ઓળામાં, પ્રલંબાતી
સાંજઉદાસી

૧૧.

પીઠી ચોળાવી
બેઠાં છે ડેફોડિલ્સ
ઘાસમંડપે

૧૨.

પ્રદક્ષિણા તો
ફરી’તી વડે, કાચો
હશે તાંતણો?

૧૩.

સમીસાંજના
ઘાસ ચમેલી કરે
વિશ્રંભકથા

૧૪.

સાવ નિરાંતે
બેઠું છે તારું નામ-
જીભબાજઠે

‘અત્તર-અક્ષર’ (મારો નવો હાઈકુસંગ્રહ)

March 5th, 2011

ઊર્મિ અને જયશ્રીની અણમૂલી ભેટ પન્નાનાયક.કૉમ વેબસાઈટને આજે બે વર્ષ થયાં. કેટલાંય કાવ્યો મૂકાયાં ને હકારાત્મક પ્રતિભાવ પણ સાંપડયો. આ વેબસાઈટ માટે તેમનો જેટલો આભાર માનું તેટલો ઓછો છે.

મારી વેબસાઈટ પર મારી ગેરહાજરીનું કારણ તાજેતરમાં મારા ‘અત્તર-અક્ષર’ (હાઈકુસંગ્રહ)નું ઈમેજ પબ્લિકેશન્સ દ્વારા જાન્યુઆરીની ૨૫મીએ થયેલું પ્રકાશન.

attar-akshar-pn3

સંગ્રહમાં ૨૦૬ હાઈકુ છે. પ્રસ્તાવના (“સત્તર અક્ષરમાં અનુભૂતિનું અત્તર”) શ્રી. સુરેશ દલાલની છે. સંગ્રહમાંથી ત્રણ હાઈકુ રજૂ કરું છુ.

૧.

અમેરિકામાં
બા નથી, ક્યાંથી હોય
તુલસીક્યારો?

૨.

પારિજાત ના-
વેરાણાં છે હાઇકુ
કેસરવર્ણાં

૩.

રેશમપોત
સપનાનું, જાગું ત્યાં
સરકી જાતું

“આ હાઈકુ એની ચિત્રાત્મકતાને કારણે, એના કલ્પનને કારણે સ્પર્શી જાય એવાં છે. ગુજરાતી કવિતાસાહિત્યમાં સ્નેહરશ્મિની પડખે જો કોઈનાં પણ હાઈકુ દમામથી બેસી શકે એવાં હોય તો તે પન્ના નાયકનાં છે.”  -સુરેશ દલાલની પ્રસ્તાવનામાંથી..

‘અત્તર-અક્ષર’ હાઈકુસંગ્રહ વિશે વધુ જાણવા માટે આ પાનાની મુલાકાત લેશો… ‘અત્તર-અક્ષર’ હાઈકુસંગ્રહ

હાઈકુ (૬)

December 24th, 2009

૧.

અંગઅંગ આ
પલળ્યાં,ધોધમાર
સ્મૃતિ-વરસાદે

૨.

આસોપાલવ
ના અહીં, દ્વારે ટાંગ્યાં
સ્મિત-તોરણ

૩.

ઈચ્છામૃત્યુ જો
મળે, મળે કવિતા
બાહુપાશમાં

૪.

ઉપવનમાં
પવન ગાતો ગીતો-
વૃક્ષો ડોલતાં

૫.

કૂણાં તૃણની
ઓઢણી અંગે ઓઢી
ધરા શોભતી

હાઈકુ (૫)

December 15th, 2009

૧.

મારી કવિતા-
બાવળવને મ્હોર્યું
ચંદનવૃક્ષ

૨.

ભરબપોરે
કિરણ ચિચિયારી
અસહ્ય તાપે

3.

ટહુકો રેલ્યો
કોયલે, ગુંજી ઊઠયું
આખ્ખું કાનન

૪.

તડકે લૂછી
લીધાં, ફર્શ પરનાં
પગલાં ભીનાં

૫.

સૂરજ ફરે –
ફરતા મનસૂબા
સૂર્યમુખીના

હાઇકુ (૪)

November 19th, 2009

૧.

આગને ઠારે
જળ, કોણ ઠારતું
જળની આગ?

૨.

કડડભૂસ
તૂટયા પ્રીત-કાંગરા-
બચી ગૈ ક્ષણો

૩.

કલરવતું
ઝરણું, ગીચ વૃક્ષો.
ખાલી બાંકડો

૪.

છાબડીમાંનાં
પારિજાત, વીણેલાં
પરોઢ ગીતો

૫.

ઘેરી રાતનો
અંધકાર કપાયો
સૂર્યકાતરે

હાઇકુ (૩)

October 20th, 2009

૧.

અંગ સંકોરી
તળાવપાળે સૂતી
થાકી બપોર

૨.

પારિજાત ના-
વેરાણાં છે હાઈકુ
કેસરવર્ણાં

૩.

પશુ તો હિંસ્ર
પણ કાં હણે જન
જન સહસ્ર?

૪.

વર્ષાસંગીત.
વાદળોનાં મૃદંગ-
વીજળી નૃત્ય

૫.

સમીસાંજના
તૃણે લેટે, આળોટે-
કિરણધણ

હાઇકુ (૨)

October 9th, 2009

૧.

અંગ સંકોરી
પોઢયું છે પતંગિયું
પુષ્પપલંગે

૨.

કરચલીઓ
ચ્હેરે ને સ્નેહ પર
પડી તે પડી

૩.

કૂંડે સુકાતી
તુલસી, શોધ્યા કરે
બાનાં પગલાં

૪.

જીરવવાને
પતંગિયાનો ભાર-
નમતું ઘાસ

૫.

ઝાકળબિંદુ
ગુલાબપાને, કરે
નકશીકામ

હાઇકુ

September 21st, 2009

૧.

અમાસ રાતે
ચંદ્ર શોધવા, મળી
તારાની ઠઠ

૨.

ઊડયું એક જ
પંખી ને કંપી ઊઠયું
આખુંય વૃક્ષ

૩.

ઊપડે ટ્રેન-
ફરફરી ના શકે
ભીનો રૂમાલ

૪.

ગમે તેટલી
ઊડતી ધૂળ, કદી
ન મેલાં ફૂલ

૫.

અમેરિકામાં
બા નથી, ક્યાંથી હોય
તુલસીક્યારો?